Nominasies ingewag vir beste 'Diensverskaffer'-kompetisie

Die Malmesbury Sakekamer se Diensverskaffer van die Jaar-kompetisie ontvang nou nominasies. 

Hierdie jaarlikse geleentheid bied 'n wonderlike platform vir plaaslike besighede om erkenning te kry vir hul uitmuntende dienslewering en bydrae tot die gemeenskap.

Die kriteria is soos volg:

Indeling van Besighede

Besighede sal in vier kategorieë ingedeel word, gebaseer op die aantal personeellede:

Klein besighede: 1 – 10 personeellede

Medium besighede: 11 – 25 personeellede

Groot besighede: 26 en meer personeellede

Individuele diensverskaffer: 'n Persoon wat self dienste lewer of in diens staan van 'n diensverskaffer

Stemprosedure

Die verkiesing sal deur 'n nominasie- en stemproses plaasvind. Inwoners van Malmesbury word uitgenooi om hul gunsteling diensverskaffers te nomineer. Ná die nominasies, sal die genomineerdes aangekondig word en die publiek sal dan kan stem vir hul gunstelinge in elke kategorie.

Die vyf besighede met die meeste stemme in elke kategorie sal as finaliste aangewys word. Die wenners sal tydens 'n gala-aand op 26 Oktober aangekondig word, waar al die finaliste, vriende en belangstellendes welkom is.

Belangrike Inligting

Elke persoon het net een stem.

Slegs inwoners en werkers van Malmesbury mag stem.

Welsynsorganisasies soos Jo Dolphin en Sinethemba, wat voorheen gewen het, kwalifiseer ook as besighede en kan genomineer word.

Die wenners word tydens die galadinee op 26 Oktober bekend gemaak.

Vir meer inligting, besoek asseblief www.sakekamer.co.za.